Emilie Hetland Drittbyen Ein gresk-norsk oljetragedie

UTDRAG S.34-35:

Journalisten og Nokon får hast på seg – Nokon tar ut fleire papir idet dei går ut. Ordføraren og Jenta er åleine. Stille.

ORDFØRAR

Me har nokre lovar og reglar her. For at folk skal få leve ut det beste av seg sjølv utan at det går dei til hovudet.

JENTA

Eg merkar at mykje har forandra seg...

ORDFØRAR

Ja. Alt har blitt betre. Det er få som hugsar korleis det eigentleg var her før... mennesket gløymer jo så lett. Du hugsar kanskje?

JENTA

Berre i kjensler. Eg var ung då eg drog.

ORDFØRAR

Då kan eg hugse for deg. Det var fattig. Usivilisert. Ingen hadde arbeid. Folk flest åt poteter til middag kvar dag, kan du tenkje deg? Poteter. Og gulrøter. Alt som låg i skitten jord, det skulle folk ha. Er det ikkje latterleg å tenkje på når rikdommen berre låg ein steinkast unna... der ute i havet.

Ordføraren ser ut vindauget med store auge.

ORDFØRAR

Veit du, det var eg som fekk det til.

JENTA

Kva?

ORDFØRAR

StoreOljeSelskapet – at hovudkontoret deira skulle liggje her, det var det eg som sørga for. Ikkje i helvete om dei skulle ha det inni hovudstaden, ikkje på tale. Så lenge eg er ordførar her, skal alle som bur i denne byen dele rikdommen ifrå olja.

JENTA

Høyres i utgangspunktet ut som ein fornuftig plan.

ORDFØRAREN

Klart det er. Den byen du forlét då du... ja, eg antar du skulle ut i verda og finne deg sjølv – slik er det vel med sarte sjeler... den byen finst ikkje lengre. Dei lovane og reglane som gjaldt i fattiglandet – dei gjeld ikkje lengre.

Ordføraren går til aztekerskrinet og tek eit dreg av det kvite pulveret.

JENTA

Eg merkar eg må oppdatere meg litt på lovar og regler.

ORDFØRAREN

Det må du.

JENTA

Og så vil eg gjerne vite litt meir om kvifor eg er her...?

ORDFØRAREN

Du skal få ein pris.

JENTA

Det har eg skjønt.

ORDFØRAREN

Og eit oppdrag.

JENTA

Oppdrag?

ORDFØRAREN

Ja, du er dokumentarskaper, er du ikkje?

JENTA

Eg er det.

ORDFØRAREN

Me vil gjerne at du lager ein dokumentar. Om byen. Eller – ein slags trailer. Verda må få vite kor godt me har det her. Me må dele vår kunnskap, vårt engasjement, måten å drive på. Ja, det er jo det heile kunstnersatsinga handlar om. Dei beste – dei kjem herifrå. Og kvifor? Jo, det er fordi me veit å skape det beste.

JENTA

Det beste?

ORDFØRAREN

Dei beste produkta, dei beste folka, det beste livet.

Jenta er usikker.

JENTA

Det høyrest ut som eit stort oppdrag.

ORDFØRAREN

Kjempestort.

JENTA

Eg har ein del andre prosjekt eg eigentleg held på med for tida...

ORDFØRAREN

Sei eit tal.